దక్షిణాఫ్రికా కెప్టెన్ తెంబా బ‌వుమా రికార్డు... 74 ఏళ్ల టెస్ట్ క్రికెట్ చరిత్రలో ఇదే తొలిసారి

08-01-2025 Wed 15:04 Sports

Temba Bavuma creates world record in Test cricket Histrory

బవుమా సారధ్యం వహించిన తొలి 9 టెస్టుల్లో ఎనిమిదింట దక్షిణాఫ్రికా గెలుపు
ఈ ఘనత సాధించిన రెండవ కెప్టెన్‌గా రికార్డు
దిగ్గజ క్రికెటర్ల సరసన నిలిచిన బవుమా

దక్షిణాఫ్రికా జట్టు టెస్ట్ ఫార్మాట్ కెప్టెన్ తెంబా బవుమా ఈమధ్య అదరగొడుతున్నాడు. పరుగుల వరద పారిస్తున్నాడు. వ్యక్తిగత ప్రదర్శనతో పాటు సారథిగానూ అద్భుతాలు సృష్టిస్తున్నాడు.

సఫారీలు ఇటీవల పాకిస్థాన్‌పై 2-0 తేడాతో టెస్ట్ సిరీస్‌ను క్లీన్ స్వీప్ చేయడంతో బవుమా దిగ్గజ ఆటగాళ్ల సరసన చేరాడు. బవుమా కెప్టెన్‌గా వ్యవహరించిన తొలి 9 మ్యాచ్‌ల్లో దక్షిణాఫ్రికా ఏకంగా ఎనిమిది విజయాలు సాధించింది. దీంతో, గత 74 ఏళ్ల టెస్ట్ క్రికెట్ చరిత్రలో బవుమా పేరిట ఒక రికార్డు నమోదయింది. కెప్టెన్‌గా తొలి 9 టెస్టుల్లో అత్యధిక విజయాలు సాధించిన రెండవ ఆటగాడిగా బవుమా నిలిచాడు. తద్వారా... ఆస్ట్రేలియా మాజీ కెప్టెన్లు వార్విక్ ఆర్మ్‌స్ట్రాంగ్, లిండ్సే హస్సెట్‌ల సరసన చేరాడు.

కాగా, ఇంగ్లండ్ మాజీ కెప్టెన్ పెర్సీ చాప్‌మన్ తొలి 9 టెస్ట్ మ్యాచ్‌లు అన్నింటిలోనూ తన జట్టుని గెలిపించి చరిత్ర సృష్టించి అగ్రస్థానంలో నిలిచాడు. 1921లో చాప్‌మన్ ఈ రికార్డు సాధించాడు.

ఇదిలావుంచితే, పాకిస్థాన్‌పై టెస్ట్ సిరీస్‌ గెలుపుతో దక్షిణాఫ్రికా జట్టు వరల్డ్ టెస్ట్ ఛాంపియన్‌షిప్ ఫైనల్‌కు దూసుకెళ్లింది. జూన్ నెలలో ఇంగ్లాండ్‌లోని లార్డ్స్ వేదికగా జరగనున్న ఫైనల్ మ్యాచ్‌లో ఆస్ట్రేలియాతో తలపడనుంది.